BEUNDE – URDALUR – APOTA – UMANDIA – ALLARTE (Allaitz) – SAN ADRIAN – BEUNDE:
Beundetik irtengo gara pistatik ekialderantz muinoak inguratuz, Txurruko punta aldera. Ultzamako lepora iristean, gora doan bide nagusia utzi eta eskuinera joko dugu; handik aurrera, Txurruko puntaren hegoaldeko hegaletan behera egingo dugu, Urdalurreko pisten bidegurutzeraino (zubiaren ondoan)(40′). Handik, mendebalderantz igotzen den pistari jarraituko diogu, ezkerraldean topatuko dugun bide batera arte (20’). Bide hura hartuz, igoera gogortu egingo da eta muinoaren gainaldera helduko gara. Jada eremu irekian gaudenean, txabola polit batzuk utziko ditugu ezkerretara, eta minutu gutxiren buruan Apota ingurura iritsiko gara (25′). Han, arrasto gorri eta zuriak aurkituko ditugu (Gipuzkoako itzuliari dagokion IL/GR 121 ibilbidea adierazten dutenak). Seinaleei jarraituz mendebalderantz egingo dugu, Umandia aldera. Gero, eskuinera joko dugu pagadian, Umandiako ekialdeko hegaletik lepo batera ateratzeko (45′). Handik gailurrera joateko, ezkerrera biratu eta, aldapa handian gora, 20 minutuan igoko gara: 1.224 metroko garaiera eta ikuspegi bikaina. Lepora itzuli (15′) eta berriz ere markei jarraituz Allaitz mendiaren gailurrera iritsiko gara (1.231 m.). Beti arrastoei jarraituz, mendi-lepora jaitsi eta berriro Imelekutik igoko gara. Gero, pixka bat behera egin, eta, Aratzen mendebaldeko hegaletik, behean, sakonean, txabola bat duen haran txiki batera jaitsiko gara. Zuhaiztitik jarraituko dugu, eta elektrizitate-linea batetik igaro ondoren, eskuinera egingo dugu pixka bat, eta, jada markak utzita (Urbiarantz jarraitzen dute), galtzadara irtengo gara, iturriaren (iturburuaren) ondoan. Biratu berriro eskuinera, San Adriango tunelera iristeko (35′). Tunela zeharkatu eta M.F.aren aterpetxera helduko gara (10’tan). Handik Beundera 45 minututan iritsiko gara Añabasotik (pistatik ere joan daiteke).Denbora guztira: 4h 30’.
